عطله وريجيم

بدأت العطله الصيفيه وبدأت المعاناة خططت هذا الصيف اخذ اخواني واطير فيهم تركيا بلاد العثمانيين او الباب العالي العرق التركي الذي حكم المسلمين قرون واسقط في الحرب العالميه الاولى

قررنا ان تكون الرحله كويت تركيا دبي كويت

وانشالله اذا رديت راح يكون لي تقرير بالصور عن رحلتي اللي من الحين مع اني بسافر بنص شهر 8 كاتب الاماكن اللي بنروحها وبوديها اهلي كلها مع تفاصيلها الممله (احب الترتيب)ومضبط كل شي علشان لانتوهق

****

المهم بدأت العطله النيابيه التي اود ان تكون استراحة المحاربين ليرجعون بدور الانعقاد التالي في اخر شهر10 ويبدأوون الانتاج على فكره الى الان اقر المجلس حول 34 قانون ولكن المشكله ان اغلب القوانين مقدمه من النواب نفسهم والحكومه الى الان لم تؤدي دورها الطبيعي وهو اغراق لجان المجلس بمشاريع القوانين التي تحتاجها للأصلاح والمضي قدما بتعديل الاوضاع الاقتصاديه والاجتماعيه والداخليه والخارجيه للدوله ومواطنيها

المهم مابي اضيق خلوقكم واييب سيرة الحكومه

*****

انشالله يقبلوني في برنامج الماجستير اللي مقدم عليه ....دعواتكم لأني مليت وانا بطالي من تخرجت من الجامعه

****

خبر سار

بديت ريجيم وصارلي شهر ونازل ليلحين 12 كيلو وابي نفسهم خلال الصيف لأظهر بنيو لوك مع بداية دور الانعقاد القادم .....دعواتكم

يعني انشالله قبل رمضان اكون نازل 24 الى 30 كيلو قولو اميييييييييييييييييييييين

اللي يبي جدول الريجيم يقولي لأني مسويه بروحي ولحد يقولي لازم تروح دكتور انا رحت المستوصف وسويت فحص دم كامل سكر ضغط والحمدلله كل شي اوكي وعرفت نسبة الدهون والماء بجسمي ووسويتلي ريجيم يعني صرت دكتور تغذيه او كما قيل اخصائي تغذيه وصرت اعرف اسوي جداول ومضبط الدنيا بروحي بدون صرف فلوس ولا ادويه ولا شي لا واشتركت بنادي وصرت مدرب رياضي واسوي جداول رياضيه

يعني على كيف كيفكم

يعني

تبون مستشار سياحي او وكيل سفر

موجود انا

تبون خبير تغذيه

موجود انا

تبون مدرب رياضي او كابتن

موجود

اكيد عرفتو انا